Usa sa mga init nga isyu karon sa nasud mao sugyot balaodnon sa criminal responsibility diin gi tuki ni Senador Robin Padilla nga ipaubos kini ngadto sa edad (10) anyos. Sa kasamtangan, ang legal nga edad sa criminal responsibility sa Pilipinas mao ang 15 anyos, base sa Juvenile Justice and Welfare Act of 2006.
Sa eksklusibong pakighinabi sa Bombo Radyo Malaybalay, kay Atty. Eddie Cuaresma, usa ka legal expert, nga dili na kini angay pa ubson. Matud pa ni Cuaresma, insakto na ang 15 anyos isip edad nga mahimong manubag sa balaod ug kinahanglan nga lawom nga deliberasyon ug taas nga proseso ang buhaton una pa kini mausab.
Dugang pa ni Cuaresma, ang pagpaubos sa edad sa criminal responsibility kinahanglan nga masusi pag-ayo sa Senado uban sa tabang sa mga eksperto, ilabina sa sa legal ug child psychology. Matud pa niya, dili lang kini isyu sa balaod, apan usa usab ka moral ug sosyal nga responsibilidad.
Gipasabot usab ni Atty. Cuaresma nga usa sa mga rason nganong daghang kabatan-onan ang nalambigit sa krimen mao ang problema sa pamilya, sama sa kakulang sa giya sa ginikanan, kabus sa panginabuhi, ug dili maayong palibot. Busa, giingon niyang mas angay tutokan ang pagpalig-on sa mga programa alang sa proteksyon ug edukasyon sa mga kabataan imbis nga silutan sila sa sayo nga edad.Â