Gipasiugda ni Senate President Pro Tempore Panfilo “Ping” Lacson nga ang ebidensya lamang ang iyang basehan sa desisyon kung mosaka sa Senado ang impeachment trial batok kang Vice President Sara Duterte.
Sumala ni Lacson, striktong sundon niini ang mga lagda sa impeachment ug wala na siya’y laing konsiderasyon nga himuon nga basehan sa iyang boto.
Matud ni Lacson nga padayon siyang nagtuon sa proseso aron masiguro nga patas ug husto ang iyang pag-apil isip posibleng senator-judge.
Gipahimangnoan usab ni Lacson ang iyang mga kauban nga senador nga magpakita og angay nga batasan ug professional nga pagdumala kung sila mahimong mag-alagad isip senator-judges.
Gipasabot niini nga importante nga magpabilin silang neutral ug likayan ang bisan unsang lihok o pahayag nga mahimong makita nga pabor sa prosekusyon o depensa.
Gipadayag usab niini ang simpatiya kang Senate President Vicente “Tito” Sotto III, nga mao ang posibleng molingkod isip presiding officer sa impeachment trial.
Matud ni Lacson nga dako ang responsibilidad ni Sotto sa pagdumala sa mga argumento sa duha ka kampo.
Matod pa ni Sotto, nag-andam na usab kini alang sa posibleng impeachment trial ug gitun-an na niini ang impeachment rules, court rules, ug senate procedures aron masiguro ang hapsay nga proseso.
Sa kasamtangan, gilauman nga hisgutan sa Senado ang posibleng iskedyul ug preparasyon alang sa impeachment trial aron mabalanse ang legislative work ug ang posibleng pagdungog sa kaso.