MALAYBALAY CITY — Patay nang nakaplagan ang usa ka lalaki nga nagtrabaho isip laborer sulod sa usa ka barong-barong didto sa Purok-1, Barangay Can-ayan, ning dakbayan, pasado alas-8:00 sa buntag niadtong Hunyo 17.
Sa report gikan sa kapulisan, nadiskubrehan ang biktima nga nagbuy-od ug wala na’y kinabuhi diin nakuha sa iyang kilid ang usa ka sudlanan sa hilo nga dako ang pagtuo nga maoy giinom niini aron pagkutlo sa iyang iyang kinabuhi. Matud sa kabanay, kataposang nakit-an ang biktima daplin sa barangay road niadtong naglabay nga adlaw, Hunyo 16, ug duna’y batasan nga magpundo sa maong payag kon dili mopauli sa ilang balay.
Gibutyag usab sa kabanay nga duna na’y kaagi sa susamang trahedya ang pipila ka miyembro sa ilang pamilya kaniadtong mga milabay nga tuig. Gikumpirma naman sa Malaybalay City Police Station nga limpyo ug walay nakitang bisan unsang timailhan sa foul play sa nahitabong kamatayon sa maong biktima.