Sikop sa gikasang dinalian nga entrapment operation ang siyam (9) ka mga personahe ug enforcers sa Land Transportation Office (LTO) Caraga didto sa maong lungsod sa Buenavista, Agusan Del Norte, karung buntag, Hunyo 18.
Ang maong operasyon hiniusang gipangunahan sa LTO Central Office ug sa kapulisan sa rehiyon human dagsa ang mga reklamo batok sa maong mga enforcers. Subay sa impormasyon gikan sa usa ka opisyal sa LTO Central Office, dugay nang gipanid-an ang maong grupo gumikan sa ilang modus nga pagpangharang ug pagpangayo og ilegal nga kwarta gikan sa mga biyahedor nga duna’y giingong violations.
Dako namang kalipay ang gibati sa mga drayber sa pagkasikop sa maong mga suspek tungod sa kahasol nga gihatag niini sa kadalanan. Gani, gibutyag sa usa ka drayber nga niadtong bulan sa Pebrero karong tuiga, nahurot ang iyang ₱15,000 human siya giharang ug gipangitaan og bikil sa maong grupo. Sa karon, gihaya na ang mga seryosong kasong kriminal ug administratibo batok sa mga dinakpan.