Moabot ngadto sa 240,000 ka mga residente sa Kuancheng County, Hebei Province sa China ang grabeng naapektuhan human miigo ang Bagyong Bavi, nga giila karon nga labing kusog nga bagyo nga mihapak sa mainland China karong tuiga. Tungod sa walay undang nga kusog nga ulan, nakasinati og grabeng pagbaha ang amihanan ug amihanan-sidlakang bahin sa nasod diin daghang kalsada ang nahisama na sa mga suba ug duna pa’y mga sakyanan nga nangaanod.
Tungod sa kakusog sa baha, gibana-banang 1,800 ka mga residente sa Kuancheng ang na-stranded, ug prayoridad karon sa gobyerno ang dinalian nga pagbalhin ug paghatag og temporaryong puy-anan kanila. Gipataas na usab sa red alert ang probinsya sa Liaoning tungod sa kakuyaw sa kalit nga pagbaha o flash floods, hinungdan nga gisuspinde una ang mga trabaho, negosyo, ug mga klase sa mga apektadong lugar.
Nagpasidaan ang China Meteorological Administration nga padayon pa silang makasinati og dalugdog, kilat, ug pag-ulan og yelo (hailstorms) sa pipila ka bahin sa amihanan ug sentral nga China. Gawas niini, gisuspinde na usab ang mga biyahe sa tren sa kapin sa 30 ka riles sa Shenyang samtang wala pa milurang ang dautang dagan sa panahon.