Miabot na sa kapin 3.2-milyon ka pesos ang kinatibuk-ang danyos human sa sunod-sunod nga 33 ka insidente sa sunog nga miigo sa probinsya sa Bukidnon sulod lamang niining bulan sa Abril.
Sa report gikan sa Bureau of Fire Protection (BFP) Bukidnon pinaagi ni SFO2 Reny R. Rubillos, nasayran nga ang maong mga sunog kasagarang nagsugod sa napasagdan nga pagluto, kandila, ug pagpangsunog sa sagbot taliwala sa grabeng ting-init. Ang mga siyudad sa Valencia ug Malaybalay, uban ang lungsod sa Maramag ug Manolo Fortich, ang nakatala sa labing daghang kaso.
Lakip usab sa naapektuhan ang gatusan ka ektarya sa kakahuyan tungod sa grass ug forest fires, apan napalong na kini sa koordinasyon sa BFP ug environmental agencies. Tungod niini, gipahugtan pa sa mga otoridad ang ilang kampanya sa fire prevention aron malikayan ang dugang pang trahedya.