Nakatigom ang gobyerno sa Pilipinas og ₱84.9 bilyon pinaagi sa gipahigayong auction sa Retail Treasury Bonds (RTB32), human kini gidagsang ug na-oversubscribe og unom ka pilo sa mga mamumuhunan.
Ang maong pagpagawas sa RTB32 nagtimaan usab sa ika-25 nga anibersaryo sa retail treasury bond program sa nasud, diin nakatigom na kini og kapin ₱6 trilyon gikan niadtong tuig 2001 aron pondohan ang nagkalain-laing proyekto alang sa kalamboan sa nasud.
Gipatugbaw ni Finance Secretary Frederick Go nga nagtumong ang maong programa sa pagpalapad sa financial inclusion, pinaagi sa paghatag og direktang higayon sa mga ordinaryong lungsuranon nga makapamuhunan sa capital markets sugod sa ₱5,000 lamang gamit ang mga mobile banking ug digital platforms sama sa LANDBANK, OFBank, PDAX, GBonds sa GCash, ATRAM, ug RCBC Pulz.