Personal nga mitambong kagahapong adlawa, si kanhing presidente Rodrigo Roa Duterte sa ikatulong status conference batok sa iyang kaso nga crimes against humanity sa International Criminal Court o ICC sa The Hague, Netherlands.
Kini ang unang publikong pagpakita sa 81-anyos nga kanhing lider human sa kapin usa ka tuig sukad sa iyang kataposang pagpakita pinaagi sa video link niadtong Marso 2025, human kini maaresto.
Mitambong si Duterte sa courtroom human giklaro ni Presiding Judge Joanna Korner sa ICC Trial Chamber III nga gilauman sa korte ang iyang personal nga presensya, human isumite sa mga medical expert ang ilang evaluation report.
Subay niini, Ang prosekusyon adunay dul-an 20,000 ka items sa evidence lists ug nangayo og 193 ka oras alang sa ilang mga saksi.
Tungod niini, gipunting sa korte nga ang prosekusyon kinahanglan motan-aw kung hain lamang ang labing importante nga mga saksi ug ebidensiya aron dili sobra ka taas ang proceedings.
Samtang, mireklamo ang depensa sa pamaagi sa pag-disclose sa mga dokumento.
Diin adunay 400 ka panid nga dokumento ug 347 pa lamang ka panid ang nadawat sa depensa.