Gibutyag ni Senate Pro tempore Panfilo Lacson nga posibleng dali nga ma-convene ang Senado isip impeachment court sa dihang madawat na ang Articles of Impeachment batok kang Bise Presidente Sara Duterte, apan posibleng sa Hunyo pa magsugod ang aktwal nga husay.
Sumala ni Lacson, mokabat og dili moubos sa tulo ka semana ang proseso, apil na ang pagpadala sa summons, pagdawat sa tubag sa depensa, ug pre-trial alang sa stipulations ug pagmarka sa ebidensya.
Gipahinumdoman usab niini nga ang impeachment trial ni kanhing Chief Justice Renato Corona diin nagkagubot tungod sa kakulang sa sayong preliminary conference, nga miresulta sa mga “surprise” nga mga testigo.
Gidugang pa ni Lacson nga samtang walay Temporary Restraining Order gikan sa Korte Suprema, magpadayon ang proseso.
Apan mahimo gihapon kini botohan sa impeachment court kung adunay ipagawas nga mando.
Matud pa niini nga nagpundok na ang mga senador aron mag-andam, ug gipahinumdoman sila nga molihok isip “mga huwes” ug magpabiling neutral tali sa prosekusyon ug depensa.