Gikumpirma ni Senate President Pro Tempore Panfilo “Ping” Lacson nga apil si kanhi House Speaker Martin Romualdez sa mga girekomendang kasuhan sa draft report sa Senate Blue Ribbon Committee may kalabutan sa giingong anomalya sa pondo alang sa mga flood control projects.
Gipasabot ni Lacson nga apil si Romualdez sa ikaduhang kategorya sa mga personalidad nga nasulti sa mga pagdungog—mga indibidwal nga mitunga ang ngalan sa mga testimonya sa mga testigo apan walay direktang ebidensya nga nagpakita nga nakadawat sila og kwarta.
Matud pa ni Lacson, bisan giakusahan sa surprise witness nga si Orly Guteza ang pagdala og kwarta ngadto kang Zaldy Co ug Romualdez, wala’y gipakita nga lig-on nga pamatuod o direktang ebidensya nga nakadawat og kickback ang kanhi House Speaker.
Dugang pa, nahisgutan pag-usab sa Senado ang mga alegasyon nga nagkonektar kang Romualdez sa mga contractor nga sila Sarah ug Curlee Discaya, nga giingong gigamit isip “front” sa pagpalit og mahalon nga propiedad sa Makati City.
Bisan pa niini, gipunting ni Lacson nga walay naipresentar nga direktang ebidensya sa pagdungog nga makapamatood sa maong mga pasangil batok kang Romualdez.
Subay niini, miluwat si Lacson nga magpahigayon og miting ang mga senador gikan sa majority bloc aron hisgutan ang mga isyu may kalabutan sa draft report sa Blue Ribbon Committee, ilabi na ang giingong kakulang sa pirma o partisipasyon sa bisan usa ka miyembro sa minority bloc.
Matud pa ni Lacson, importante nga adunay representante gikan sa minority, labi na ang minority leader, aron mapadayon ang kredibilidad ug integridad sa report sa dili pa kini hingpit nga aprobahan sa Senado.