Duha ka indibidwal nga nagpayuhot og ilegal nga droga nadakpan sa operasyon sa Valencia City
Nadakpan sa mga otoridad ang duha ka mga suspek ug nasakmit gikan sa posisyon niini ang gituohang shabu nga adunay gibanabanaang kantidad nga ₱48,280 atol sa usa ka buy-bust operation sa Valencia City.
Ang operasyon gipahigayon sa Valencia City Police Station (VCPS) uban sa pakigtambayayong sa City Anti-Drugs Special Unit Team (CADSUT) ug Provincial Intelligence Unit (PIU) sa Bukidnon Police Provincial Office takna alas 2:36 sa hapon niadtong Hunyo 20, 2026 sa Purok 8, Barangay Lilingayon, Valencia City.
Ang mga nadakpan giila pinaagi sa ilang mga alyas nga “Digol,” 38 anyos, ug “Chris,” 62 anyos, nga parehong mga mag-uuma ug residente sa Barangay Lurugan.
Matud sa kapulisan, bag-o pa lamang natumbok sa operasyon si “Digol,” samtang si “Chris” apil na sa monitoring sa drug-related nga impormasyon.
Gikustodiya na sa VCPS ang duha ka suspek alang sa hustong proseso.
Samtang nagpadayon usab ang suporta sa lokal nga pagapangulohan sa Valencia City sa mga programa batok sa ilegal nga droga aron mapadayon ang kalinaw ug seguridad sa komunidad.