Gipadayag sa labor sector ang ilang dakong kasagmuyo o pagkadismaya human wala gihapon nalakip sa prayoridad sa bag-ohay nga special session sa Kongreso ang gipangayo nga ₱200 nationwide wage hike, bisan pa man nga gipatawag mismo kini ni Presidente Ferdinand Marcos Jr.
Matud ni Atty. Jose Sonny G. Matula, presidente sa Federation of Free Workers (FFW), nakapabalaka kini kanila tungod kay bisan pa og naaprubahan na sa Senado ang ₱100 nga wage increase ug napasar na usab sa Kamara ang ₱200 nga umento, wala gihapon kini gihatagan og prayoridad sa gobyerno.
Gikumpirma ni Matula nga makadaghan na nilang gipangayo ang higayon nga makigpulong mismo kang Presidente Ferdinand Marcos Jr., apan gibati nila nga dili matud pa patas ang pagtagad sa ilang sektor.
Matud niini, samtang dali rang makapangayo og dayalogo ug makaabot sa Malacañang ang mga representante sa dagkong negosyo ug employers, ang grupo nga nagbarog alang sa mga ordinaryong mamumuo nagpabilin nga wala pa madungog ang ilang mga mulo.