DOLE nagmando og working permit alang sa mga batang ubos 15 anyos sa online content

Gimandato sa Department of Labor and Employment (DOLE) nga kinahanglan adunay Working Child Permit (WCP) ang mga batang ubos sa 15 anyos sa dili pa kini moapil sa vlogs, livestreams ug uban pang online content.

Katuyoan niini nga mapalig-on ang pagpanalipod sa kabataan batok sa child labor ug pagpahimulos pinaagi sa  mga digital platforms.

Ang permit kinahanglan usab alang sa pag-apil sa digital advertisements, online endorsements, web series, podcasts ug streaming services.

Ang mga ginikanan, legal guardians ug digital employers maoy responsable sa pagkuha sa permit sa DOLE sa dili pa magsugod ang paghimo ug content nga naglakip sa mga bata.