Mahimo nang ipasaka sa bag-ong hotline sa Department of Labor and Employment (DOLE) ang mga reklamo ug pangutana sa mga mamumuo ug mga employer kalabot sa mga isyu sa pamuo o trabaho.
Matud ni DOLE Secretary Francis Tolentino, gilusad sa kagawaran ang Hotline 15/30 o “Fifteen Thirty” nga magamit 24 ora matag semana.
Nag-andam ang DOLE og 20 ka agents nga mudawat sa mga tawag aron mas paspas nga matubag ang mga kabalaka sa publiko.
Lakip sa mahimong ireport ang wala o nalangan nga pagbayad sa sweldo ug benepisyo, ilegal nga pagtangtang sa trabaho, ug uban pang paglapas sa mga sumbanan sa pamuo.
Mahimo usab nga ipasaka pinaagi sa hotline ang mga reklamo kalabot sa kaluwasan ug kahimsog sa trabahoan, lakip ang mga peligro nga may kalabotan sa grabeng kainit.
Dugang pa, modawat usab ang hotline og mga pangutana bahin sa pagpangita og trabaho ug uban pang programa sa kagawaran.
Gipasalig ni Tolentino nga sulod lamang sa usa ka adlaw i-refer sa tukmang regional o field office sa DOLE ang mga madawat nga reklamo aron masusi ug matubag dayon.
Samtang, nagpasidaan ang kalihim batok sa mga prank call aron dili masayang ang oras sa mga motubag ug dili malangan ang paghatag og tabang sa mga mamumuo nga adunay lehitimong reklamo.