Nagpabiling tensyonado ang sitwasyon sa Middle East human mitala gihapon og serye sa mga pag-atake ang nasud sa Iran bisan pa man sa unang gipahibalo nga ceasefire sa rehiyon.
Sa pakighinabi sa Bombo Radyo Malaybalay ngadto kang Nicole Bedtao, Bombo International News Correspondent sa Abu Dhabi, gibutyag niini nga halos adlaw-adlaw ang masinating mga pagbuto ug duna’y mga emergency alerts nga naghatag og kahadlok sa mga residente, ilabi na ang peligro gikan sa mga nangatagak nga debris.
Sumala sa correspondent, wala pa gyud hingpit nga napatuman ang ceasefire tungod kay padayon ang mga pag-atake sa mga oil tanker ug oil companies sa Kuwait ug sa kasikbit nga mga dapit. Gipasabot ni Bedtao nga mas nahimong komplikado ang sitwasyon karon sanglit naggamit na ang pikas bahin og mga advanced missiles imbes nga mga ordinaryong drones o armas lamang.
Base sa datos gikan sa field, kapin sa 200 ka tawo na ang natalang nasamdan tungod sa mga nangatagak nga tipaka sa bomba ug epekto sa mga missile strike. Bisan pa man sa maong hulga, ang mga katawhan naningkamot gihapon sa pagpadayon sa ilang adlaw-adlaw nga panginabuhi ug trabaho human sa matag pagbuto.Dugang pa ni Bedtao, limitado ang mga report nga mogawas sa social media ug public news tungod sa hugot nga restrictions sa maong dapit. Bisan pa niini, padayon ang monitoring sa sitwasyon aron makahatag og tukmang impormasyon sa publiko ug malikayan ang mas dako pang kadaut.