ipasalig sa Philippine Army nga wala na silay namonitor nga bisan unsang matang sa ilegal nga pangolekta o pangilkil sa mga komunidad sa Bukidnon, dungan sa pag-awhag sa mga negosyante nga i-report dayon kung adunay mosulay sa paghimo niini.
Sa pakighinabi kang BGen. Seigfred C. Tubalado, Commander sa 403rd Infantry “Peacemaker” Brigade, iyang gipahayag nga sa bag-ohay lang nga aktibidad, 14 ka mga friends rescued (former rebels) ang nakadawat og livelihood assistance ug ₱15,000 nga cash support matag usa pinaagi sa Provincial DILG.
Gipasabot sa heneral nga ang mga nitahan nga miyembro sa Militia ng Bayan (MB) padayong gitabangan sa kagamhanan aron hingpit nga masabtan ang mga recruitment schemes ug masiguro ang ilang malinawon nga pagpuyo. Gi-monitor usab sa militar ug mga sektoral nga grupo ang mga kabukiran ug mga tulunghaan aron mapugngan ang bisan unsang pagsulay sa pag-recruit ug pag-indoctrinate sa mga kabataan.
Gipaniguro sa Philippine Army nga wala nay tactical threat ang nahibilin nga mga miyembro sa kabukiran ug wala na silay kapasidad sa pagpahigayon og dagkong operasyon o pangolekta. Matud pa, ang nahabilin nga mga rebelde gilauman nga mosurender ra sa dili madugay tungod sa kalisod sa ilang kahimtang.
Sa pagkakaron, hugot ang suporta sa Army ug sa mga programa sa ELCAC aron mapalig-on ang kalinaw ug mapugngan ang pag-ulbo sa insurhensiya sa tibuok probinsya sa Bukidnon.