Sulod na sa Round of 16 sa FIFA World Cup 2026 ang five-time champions nga Brazil human makadaog batok sa Japan, sa iskor nga 2-1, pinaagi sa goal sa stoppage time sa Round of 32 nga dula.
Ang Japan unang nakapuntos pinaagi kang Kaishu Sano sa ika-29 nga minuto sa unang bahin. Apan mibalos ang Brazil sa ikaduhang bahin pinaagi kang Casemiro sa ika-56 nga minuto aron tablahon ang iskor sa 1-1.
Sa dihang padulong na ang dula sa extra time, nakaiskor si Gabriel Martinelli sa ika-unom nga minuto sa stoppage time human madawat ang bola sa atubangan mismo sa goal, nga maoy naghatag sa Brazil sa 2-1 nga kadaugan.
Sa sunod nga hugna, atubangon sa Brazil ang modaog tali sa Ivory Coast ug Norway alang sa usa ka puwesto sa quarterfinals, samtang opisyal nang natangtang ang Japan sa torneo.
Kahinumduman usab nga sa unang knockout match, nakasulod usab sa Round of 16 ang Canada human makaiskor sa 90+2 nga minuto sa stoppage time batok sa South Africa.