Dili gihapon makatuo ang sikat nga girl group nga BINI nga nakapasundayag sila sa usa sa labing dako nga music festival sa kalibutan, ang Coachella, didto sa California.
Sulod sa 42 ka minuto, gihatagan sa grupo ang mga tumatan-aw og world-class nga performance diin ilang giawit ang 10 sa ilang mga hit songs. Matud pa, ang mga miyembro sa BINI anaa pa sa “cloud nine” tungod sa hilabihan ka init nga pagdawat sa mga fans, dili lang gikan sa mga Pilipino kondili apil na ang mga langyaw.
Tungod sa maong kalamposan, nibuhagay ang mga pahalipay sa ilang social media accounts gikan sa ilang mga fans ug pipila ka mga sikat nga artista sa nasud.
Gikatakda nga subli nga mopasundayag ang BINI sa Coachella karong Biyernes, Abril 17, alang sa ikaduhang semana sa festival.