Nagpatuman ang Estados Unidos og bag-ong taripa batok sa dul-an 60 ka trading partners tungod sa alegasyon nga napakyas sila sa pagpugong sa mga produktong gikan sa forced labor.
Sumala sa Office of the US Trade Representative, ang mga nasud nga mosunod sa pagdili sa forced labor imports ipailalom sa 10% nga taripa, samtang ang wala mosunod mag-atubang og 12.5% nga taripa.
Lakip sa naapektuhan ang United Kingdom, China, European Union, Canada, Japan, ug India.
Matud ni US Trade Representative Jamieson Greer, tumong sa maong lakang ang pagtubag sa giingong paglapas sa tawhanong katungod ug pagpalambo sa kahimtang sa mga mamumuo sa tibuok kalibotan.
Kabahin kini sa mas lapad nga estratehiya ni US President Donald Trump sa paggamit sa tariffs isip instrumento sa polisiya sa patigayon.
Samtang, pipila ka nasud sama sa Brazil, Japan, ug Australia nagpahayag og kabalaka, diin gitawag sa Brazil nga “arbitraryo” ang maong desisyon ug mipasidaan og posibleng balos nga lakang.
Sumala sa mga eksperto, mahimong mosaka ang gasto sa mga negosyo ug konsumidor sa US, bisan pa nga adunay exemptions sa pipila ka produkto.