Gipalig-on sa Department of Health (DOH) ang mga serbisyo sa mental health sa mga komunidad aron mas mapaduol ang tabang sa mga nanginahanglan niini, atol sa pagtimaan sa World Mental Health Day.
Gipaambit ni “Shawn,” dili niya tinuod nga ngalan, ang iyang kasinatian sa grabeng kasubo ug pagkawala sa gana sa pagbuhat sa iyang naandan nga mga kalihokan tungod sa pressure sa pagtuon ug responsibilidad isip kamagulangang anak.
Nadayagnos siya nga adunay Generalized Anxiety Disorder ug boluntaryong misulod sa mental rehabilitation center.
Matud sa registered psychologist nga si Riyan Portuguez, importante nga maminaw, mosabot ug mahimong luwas nga kasandigan sa mga tawo nga nag-atubang og problema sa pangisip.
Samtang, padayon nga gipalapdan sa DOH ang mga serbisyo sa mental health pinaagi sa mga eskwelahan, trabahoan, pamilya ug komunidad.
Mahimong moduol sa pinakaduol nga Rural Health Unit o primary care facility ang nanginahanglan og tabang, samtang ang mga nanginahanglan og dinaliang suporta mahimong motawag sa National Center for Mental Health Crisis Hotline sa 1553.