Gikuwestiyon sa impeachment hearing ang dakong kalahian sa gideklarang sales ug remittance sa Calle 88, human mabutyag nga mikabat sa kapin 700 milyong piso ang remittance nga nadawat sa Anti-Money Laundering Council o AMLC, samtang 208 milyong piso lamang ang gideklarang halin sa kompanya.
Atol sa pagpangutana, gipatin-aw sa usa ka resource person nga dili siya makahatag og tino nga hinungdan sa maong kalahian, apan ang tanang pagsulod sa kuwarta sa kompanya angay nga makita sa Audited Financial Statements, ilabi na sa cash flow statement.
Dugang pa sa resource person, posibleng adunay nagkalainlaing hinungdan sa mga kuwarta nga wala makita sa maong mga pinansyal nga pahayag, apan dili siya makahatag og konklusyon kon unsa gyud ang hinungdan niini.
Samtang, gipangutana usab sa hearing ang datos sa GenCorp alang sa tuig 2025, diin mikabat sa ₱520.67 milyon ang gideklarang gross sales, samtang ₱5.34 milyon ang taxable net income ug ₱2.28 milyon ang buhis nga angay bayran.
Gikuwestiyon usab ang kapasidad sa kompanya nga adunay lima ka milyong piso nga authorized capital stock bisan pa sa kapin ₱520 milyon nga halin sulod sa usa ka tuig.