Nabulit sa dugo ang unta malinawong pagpahulay sa usa ka 39-anyos nga lalaki uban sa iyang anak human kini duguong gidunggab sa iyang kauban sa trabaho sulod mismo sa iyang kwarto sa Bereta Farm, Barangay Culase, Sumilao, Bukidnon.
Subay sa imbestigasyon sa Sumilao Municipal Police Station, nahitabo ang insidente pasado alas-10:00 sa gabii niadtong Hunyo 5, diin una nang nagka-initay sa panaglalis ang biktima ug ang 33-anyos nga suspetsado. Aron malikayan ang dugang gubot, mipalayo ug misulod sa iyang lawak ang biktima, apan gipugos og lumpag o abli sa hubog nga suspek ang pultahan ug daling giduslakan og kutsilyo kaduha sa likod ang biktima samtang naghigda.
Bisan pa man niini, nakigbisog pa ang biktima hangtod nga na-uwang sila sa ilang mga kaubang mag-uuma. Paspas nga misibat ang suspetsado apan swerteng nasubay sa mga guwardiya nga nagtago ug duka pa nga natulog sulod sa usa ka bakanteng lawak sa maong umahan. Sa karon, luwas na sa kakayagaw ang biktima nga dinaliang gidala sa Bukidnon Provincial Hospital sa Manolo Fortich, samtang tingkagol na sa selda sa Sumilao CPS ang suspek alang sa pagpasaka og saktong kaso.