Opisyal nga nasakmit sa Amerikanang si Aleshia Wiley ang titulong “largest collection of Wonder Woman memorabilia” gikan sa Guinness World Records tungod sa iyang dakong koleksiyon.
Ang taga-West Georgia nga si Wiley adunay karon nga total nga 1,581 ka piraso sa Wonder Woman memorabilia.
Sumala kaniya, nagsugod ang iyang pagkawili sa maong karakter sa unang bahin sa 2000s human niya makita ang Justice League animated series, diin nadani siya sa kusog, kaisog, ug kaalam ni Wonder Woman nga nagrepresentar sa empowerment sa kababayen-an.
Ang iyang unang koleksiyon mao ang comic book nga Wonder Woman #1 (1987) nga iyang napalit sa usa ka flea market sa Florida.
Ang iyang koleksiyon naglakip sa kapin 1,000 ka edisyon sa komiks, Funko Pop figures, action figures, ug uban pang collectibles.
Gipadayag usab ni Wiley nga pinakaespesyal para kaniya ang usa ka comic book nga adunay pirma ni Stan Lee ug aktres nga si Lynda Carter.
Bisan pa sa kadaghan sa iyang koleksiyon, sigon ni Wiley nga wala pa siya’y plano sa paghunong sa iyang papangolekta.