Gibarugan sa defense team ni VP Sara Duterte nga ang “probable cause” nga nakita sa House Committee on Justice sa duha ka impeachment complaints dili pasabot nga sad-an na ang Bise Presidente.
Sumala ni Atty. Michael Poa, spokesperson sa defense panel, ang maong desisyon pasabot lamang nga gipili sa komite nga ipadayon ug ipasa ang kaso ngadto sa plenaryo, apan dili kini ebidensya sa guilt, liability, o sala ni VP Sara Duterte.
Dugang pa niini nga dili na kini ikatingala sa ilang kampo kay gilauman na nila nga modiretso gyud ang kaso ngadto sa full trial sa Senate of the Philippines.
Bisan pa niini, nagpabilin ang panindigan sa depensa nga ang proseso sa pagdungog sa komite dili sakto ug dili uyon sa balaod, ug kini ilang gi-question na sa Supreme Court of the Philippines pinaagi sa petisyon aron mapahunong ang mga hearing.
Matud sa ilang kampo, human sa upat ka hearing, giabot ang boto sa komite nga nakakita og probable cause sa duha ka reklamo batok sa Bise Presidente, apan giingon nila nga magpadayon gihapon ang ilang legal nga pagtindog batok sa proseso.