Gipadayag ni labor sector consultant Nick Borja ang kabalaka sa grabeng epekto sa buhis ug presyo sa gasolina sa mga trabahante sa nasud.
Sumala ni Borja, dako kaayo og bahin sa presyo sa gasolina ang buhis sama sa VAT, diin sa matag ₱1,000 nga gasolina, kapin ₱100 ang mapadulong sa gobyerno.
Tungod niini, ang pagkunhod o pagkatangtang sa VAT makatabang unta sa pagpagaan sa palas-anon sa katawhan, ilabi na sa mga mamumuo.
Gipasabot usab niya nga lisod na kaayo ang kahimtang sa mga trabahante tungod sa taas nga presyo sa mga palaliton, samtang ang minimum wage dili na igo para sa adlaw-adlaw nga panginahanglan sama sa pagkaon, kuryente, tubig, ug uban pa.
Kabahin sa solusyon, gipasiugda niini ang sugyot nga adunay ₱200 across-the-board wage increase aron makatabang sa mga mamumuo sa pagsaka sa presyo sa mga palaliton.
Gipasiugda usab niya nga bisan pa og adunay gitinguhang minimum wage nga ₱1,200 hangtod ₱1,400 matag adlaw, kulang gihapon kini kung dako ang pamilya ug taas ang gasto sa panginabuhi.
Sa kinatibuk-an, nanawagan si Borja sa gobyerno ug mga policy makers nga tutukan ang buhis ug suholan aron mas mapagaan ang kahimtang sa mga trabahante.