Nakatala og bag-ong Guinness World Record ang 31-anyos nga atleta nga si Hari Chandra Giri human mikanaog sa 100 ka lak-ang sa hagdanan gamit lamang ang iyang mga kamot sulod sa 44.71 segundos.
Tungod sa iyang talagsaong stunt, nakuha niini ang titulo nga “fastest time to descend 100 steps walking on hands.”
Nahimo niya kini niadtong Enero 4 sa Yunyang, Chongqing, China, diin mikanaog siya og kapin duha ka lak-ang sa hagdanan matag segundo bisan pa man sa iyang pagbarog nga nakatu-ali.
Delikado ang maong stunt tungod kay ang gamayng sayop sa balanse mahimong mosangpot sa grabeng kadaot sa ulo, liog, ug dugokan.
Matud ni Hari, unom ka bulan siyang nag-bansay matag adlaw alang sa maong hagit.
Dugang pa niini, nga mas lisod ang paglakaw gamit ang kamot sa hagdanan itandi sa patag nga yuta tungod sa anggulo niini ug sa dakong epekto sa mga lutahan sa lawas.
Gawas sa pisikal nga pagpangandam, nag-bansay usab siya sa basa nga mga hagdan aron maandam sa lain-laing kahimtang sa panahon.
Nakasinati usab siya og mga hagit sa komunikasyon ug pinulongan atol sa iyang pagpuyo sa China, nga nakadugang sa kalisod sa iyang misyon.
Dili kini ang unang higayon nga nakarekord si Hari og Guinness World Record.
Anaa usab kaniya ang mga titulo alang sa pinakapaspas nga paglakaw gamit ang kamot samtang adunay bola nga gipit sa iyang mga bitiis, ug ang pinakapaspas nga pag-inom og 500 ml nga lemon juice samtang nag-handstand.
Alang kang Hari, ang disiplina mao ang yawe sa tinuod nga kusog ug kalampusan.
Apan gipahinumdoman niini ang mga kabatan-onan nga unahon kanunay ang kaluwasan ug sundon ang hustong pamaagi sa pagbansay sa dili pa mosulay og delikadong mga stunt.