Gilauman nga mahimong maimpeach sa House of Representatives si Bise Presidente Sara Duterte sulod sa sunod duha ka semana, sumala kang Justice Committee member ug Bicol Saro Partylist Representative Terry Ridon.
Matud ni Ridon, kumpiyansa ang House Committee on Justice nga makuha ang minimum nga 106 ka boto human ideklarang adunay probable cause batok sa Bise Presidente sa tulo ka clarificatory hearings.
Kung maaprobahan ang committee report, ipadala kini sa plenaryo diin pagahisgutan ug pagabotohan sa mga mambabalaod.
Kon mapasar, dayon kining itransmit ngadto sa Senado alang sa impeachment trial. Lakip sa mga ebidensyang giila sa komite ang giingong misuse sa confidential funds, ang ₱448 milyon nga giuli nga pondo, ang ₱6.77 bilyon nga mga transaksyon nga gi-flag sa Anti-Money Laundering Council, ug ang giingong mga hulga batok kang Presidente Ferdinand Marcos Jr..
Dugang pa ni Ridon, dili lang 106 ka boto ang ilang target kay posible pa kining moabot og 215 ka boto aron ipakita ang lig-on nga suporta sa Kamara sa impeachment complaints.
Sumala ni Representative Gerville Luistro nga lakip sa posibleng mahimong prosecution panel sila Representative Leila de Lima ug Representative Chel Diokno, uban sa ubang mambabalaod nga mahimong motindog sa Senado kon magsugod na ang impeachment trial.