Gipasiugda sa Department of Agriculture (DA) ang paggamit sa Rice-Duck Farming System isip usa ka bag-ong teknolohiya nga makatabang sa pagpauswag sa produksyon sa humay ug pagpakunhod sa gasto sa mga mag-uuma.
Sa maong sistema, gina-integrate ang pagtanom sa humay ug pagbuhi sa mga itik sulod sa humayan.
Human sa pagtanom sa humay, ginabuhian ang mga itik sulod sa uma human sa napulo ka adlaw.
Ang mga itik mao ang mokaon sa mga sagbot, insekto ug kuhol nga makadaut sa tanom nga humay, samtang makatabang usab kini sa pagpali-og sa yuta ug pagpaayo sa sirkulasyon sa tubig.
Sumala ni Senior Science Research Specialist Maridith A. Flores sa Department of Agriculture RFO-10, pinaagi sa maong pamaagi makaminos ang mga mag-uuma sa paggamit og insecticide ug herbicide tungod kay ang mga itik na ang natural nga mokontrol sa peste.
Dugang pa niini, mas modako ang abot sa humay ug adunay dugang kita ang mag-uuma gikan sa itlog ug karne sa itik.
Sa kasamtangan, nagpatuman ang DA og pilot project sa Barangay Kahaponan, Valencia City, Bukidnon nga naglangkob og 40 ka ektarya nga humayan ug 22 ka farmer beneficiaries.
Gipadayag usab nga sa miaging trial sa maong sistema, mas taas ang ani sa humay itandi sa naandang pamaagi sa pag-uma.
Tungod niini, ginadasig sa DA ang mga mag-uuma nga mo-adopt sa Rice-Duck Farming System aron mapalambo ang produksyon sa humay ug makatabang sa food security sa rehiyon ug sa tibuok nasud.