Nagpasidaan sa BFP Bukidnon sa publiko bahin sa peligro sa pagtipig o pag-stock sa daghang gasolina ug flammable liquids sa panimalay. Sa pakighinabi sa Bombo Radyo malaybalay kay SFO2 Rene Rubillos, Section Chief sa Fire Safety Enforcement Section, na matud pa delikado kini ug supak sa balaod.
Ang husto nga pagtipig kinahanglan sealed ang container, metal o plastic nga dili masunog, ug ibutang palayo sa kainit sa adlaw o init sa palibot. Mas maayo sab ibutang kini sa bodega ug tabunan og panapton aron malikayan ang peligro.
Gibutyag ni Rubillos nga regulated lamang ang gidaghanon nga puwede pagatipigan ug sobra nga pagtipig makadaot sa kaluwasan sa pamilya ug silingan. Gipakita nga ehemplo niini ang mga gasoline station nga gilubong ang tangke sa yuta alang sa kaluwasan.
Ang BFP Bukidnon nagpahimangno sa publiko sa pagsunod sa regulasyon sa DOE ug DTI aron malikayan ang sunog ug kadaut sa komunidad.