Subling giduso sa konseho ang pagpalabang sa usa ka ordinansa nga gitawag og Indigenous People (IP) code.
Ang maong ordinansa gitan-aw isip usa ka lakang sa pagpakunhod sa Poverty Incidence sa lalawigan sa Bukidnon diin gitudlo nga usa ka pinakaobreng probinsya sa nasud, base sa datos nga gipagawas sa Philippine Statistic Authourity (PSA).
Gisugyot ni Atty. Arbie Saway Llesis, Board Member ug Provincial Indigenous Peoples Mandatory Representative (IPMR), ang hingpit nga pagpatuman sa Indigenous Peoples (IP) Code isip usa ka epektibong pamaagi aron maminusan ang kakabos o poverty incidence sa probinsya sa Bukidnon.
Pinaagi sa IP Code magahinan ang mga lumad og igong pondo alang sa ilang panginabuhian, edukasyon, panglawas ug uban pang panginahanglanon lakip na ang kahigayunan nga palig-onon ang kaugalingong kultura.
Matud ni Atty. Llesis, ang maong sugyot gibase sa ilang gipahigayon nga benchmarking sa probinsya sa Sarangani, diin nakigtigom ang delegasyon sa Bukidnon sa mga opisyales sa Sarangani, lakip na ang ilang Provincial Administrator, Provincial Accountant, ug mga kauban sa IPMR, aron tun-an ang epekto sa kaugalingong IP Code nga gipatuman niadtong mga milabayng tuig.
Sumala sa report nga gipambit nakita, nga human gipatuman ang IP Code sa probinsya sa Saranggani, mikunhod ang rate sa poverty rate niini lakip na ang insurgency incidence sa maong lugar.