Gikumpirma sa National Security Council kon NSC nga nga adunay tulo ka kanhing opisyal sa gobyerno ang nagpasa sa pipila ka sensitibo nga impormasyon sa China.
Matud ni NSC Spokesperson Cornelio Valencia Jr., gisubay sa konseho ang gikaingong transmission sa mga datos ngadto sa Chinese government pinaagi sa LinkedIn ug uban pang messaging apps.
Gipasabot ni Valencia nga ang tulo ka mga Filipino adunay access sa impormasyon sa lain-laing mga paagi. Usa kanila kanhi assistant sa Department of National Defense, ang ikaduha gikaingong researcher kaniadto sa Philippine Navy, ug ang ikatulo adunay koneksyon sa usa ka opisyal sa Philippine Coast Guard nga adunay access usab sa pipila ka sensitibo nga datos.
Lakip sa gipagawas nga impormasyon ang pipila ka mga detalye kalabot sa military engagement ug personnel, lakip na ang rotation and resupply mission sa Ayungin Shoal ug sa BRP Sierra Madre, nga nagsilbi nga outpost sa Armed Forces of the Philippines sa West Philippine Sea.
Gipasalig ni Valencia, nga hugot nga gibantayan sa NSC ang isyu sa pag-espiya sa nasud hilabi na ang paggamit sa mga Pilipino isip ahente sa ubang kanasuran.
Dugang pa niini, nga ang NSC padayon nga nakig-alayon sa ubang ahensya sa gobyerno aron mapugngan ang bisan unsang hulga sa nasudnong seguridad.
Kini nga insidente nagdugang sa nagkadako nga kabalaka kabahin sa mga espionage activities sa rehiyon, taliwala sa nagkagrabeng tensyon sa West Philippine Sea