Gikonsiderar sa Konseho sa Malaybalay ang pagsaka sa pamilite sa motorela tungod sa pagtaas sa presyo sa gasolina nga resulta sa tensyon sa Middle East, nga nakaapekto sa kita sa mga drayber ug gasto sa mga pasahero sa siyudad.
Sumala ni City Councilor Hon. Atty. Rendon P. Sangalang, ginarepaso ang kasamtangang fare matrix nga nakabase sa P50 kada litro nga gasolina diin P10 ang minimum pamilite. Apan misaka na sa P55–P56 kada litro ang gasolina, busa mihangyo og adjustment ang Motorela Association.
Gihimo na ang public hearing ug gilauman nga maamendar ang ordinansa aron ma-adjust ang plite. Sa ubang lungsod sama sa Valencia City ug Maramag, anaa na sa P13 hangtod P15 ang minimum pamilite.
Gipasabot usab nga ang motorela sakop sa regulasyon sa siyudad samtang ang multicab sakop sa Land Transportation Franchising and Regulatory Board. Ilakip sa gi-amendar nga ordinansa ang klarong pakyaw rate aron malikayan ang sobra nga paningil, ug posibleng disiplinahon ang molapas sa gitakdang plite.
Gipadayag ni Sangalang nga ang pamilite magdepende gihapon sa presyo sa gasolina—kung moubos ang lana, moubos usab ang plite—ug nanawagan siya og pagsinabtanay tali sa drayber ug pasahero.