Gihangyo sa Prosecution sa International Criminal Court (ICC) ug sa abogado sa mga biktima nga ipadayon ang detensyon ni kanhi Pangulong Rodrigo Duterte samtang nagpadayon ang kaso batok kaniya sa crimes against humanity.
Matod sa prosekusyon, ang pag-waive ni Duterte sa iyang katungod nga motambong sa confirmation of charges hearing ug ang iyang pahayag nga wala niya giila ang hurisdiksyon sa ICC nagpakita nga posible siyang dili na mobalik kung hatagan og interim release.
Sumala sa ICC Prosecutor nga si Julian Nicholls, gitawag ni Duterte nga “kidnapping” ang iyang pag-aresto ug giingong gipugos siya pagdala sa The Hague, nga nagpalig-on sa kabalaka nga dili siya boluntaryong motubag sa korte.
Bisan og giingong mosubay siya sa mga pagdungog pinaagi sa livestream, wala kini matuman sa pinakabag-ong hearing.
Sa laing bahin, si defense counsel Atty. Nicholas Kaufman miingon nga dili sila mosupak sa padayong detensyon samtang naghulat pa sa desisyon sa Appeals Chamber kalabot sa ilang giapela nga ruling sa Pre-Trial Chamber I ug sa ilang hangyo nga buhian dayon si Duterte.
Dugang pa niini, mihangyo sa mga hukom sa International Criminal Court (ICC) si Kaufman nga buhian si kanhi Presidente Rodrigo Duterte tungod sa giingong huyang o kulang nga ebidensya.
Matud usab ni Atty. Joel Butuyan, representante sa mga biktima, nga dako ang risgo nga mulihok nga walay kontrol si Duterte kung buhian, ilabi na nga kapin 160,000 ka mga supporter ang nanawagan sa Korte Suprema sa Pilipinas nga ipabalik siya sa nasud pinaagi sa writ of habeas corpus.
Subay pa niini, ang mga anak ni Duterte adunay lahi-lahi nga petisyon nga nagtinguha sa iyang pagpauli.
Gipasiugda sa ICC nga nahuman na ang upat ka adlaw nga confirmation of charges hearing gikan Pebrero 23 hangtod 27.
Sulod sa 60 ka adlaw, magpagawas ang mga maghuhukom sa ilang desisyon kung kumpirmahon ba ang mga kaso ug ipadayon sa trial, ibasura ang kaso, o mangayo og dugang ebidensya.