Nakatakda ang hangtod sa 12 ka sesyon sa sunod semana alang sa confirmation of charges hearing ni kanhing Pangulong Rodrigo Duterte sa iyang giatubang nga kaso sa crimes against humanity sa International Criminal Court (ICC).
Magpadayon sulod sa upat ka adlaw ang hearing: Pebrero 23–24 ug Pebrero 26–27.
Matag adlaw adunay tulo ka sesyon.
Sa Pebrero 23, ang unang sesyon magsugod alas-5 hangtod alas-6 sa gabii, oras sa Pilipinas.
Mosunod ang ikaduhang sesyon gikan alas-6:30 hangtod alas-7:30 sa gabii, ug ang kataposang sesyon gikan alas-9 hangtod alas-10 sa gabii.
Parehas nga iskedyul ang sundon sa nahibiling tulo ka adlaw sa hearing.
Sa confirmation of charges hearing, tukion sa ICC kung adunay igo nga ebidensiya batok sa kanhing pangulo may kalabotan sa iyang giatubang nga kaso sa crimes against humanity.
Ipresentar sa Prosecution, Defence, ug sa Legal Representatives of Victims ang ilang oral submissions ngadto sa mga huwes sa ICC aron ipahayag ug depensahan ang ilang mga argumento.
Una nang gikatakda ang maong hearing niadtong Setyembre 23, apan nausab kini tungod sa sunod-sunod nga mga petisyon nga gisang-at sa kampo sa kanhing pangulo.