Naghatag ug mando ang High Court sa Ireland nga panalipdan ang kaayohan sa usa ka mag-uuma nga nanghatag na og kapin sa hapit ₱21.7 milyones ngadto sa mga kabos ug walay puy-anan.
Sumala sa korte, ang lalaki nag-edad og 40-anyos nagbaligya sa iyang umahan ug sukad niadto, sunod-sunod na ang iyang paghimo og mga donasyon.
Nagtoo kini nga gisugo siya sa Diyos nga ipanghatag ang tanan niyang kwarta isip baylo sa usa ka dapit didto sa langit.Sa atubangan ni Judge Michael Twomey, gisaysay sa abogado sa Health Service Executive (HSE) nga si Katherine Kelleher nga sugod niadtong Mayo, miusos ang bank balance sa lalaki.
Mas makapaalarma pa, matod sa HSE, duna nay overdraft nga €65,000 sa usa sa iyang mga account, nga timailhan sa padayon ug walay kontrol nga pagpang-apud-apod og kwarta.
Tungod niini, mimando ang huwes sa pagtudlo og guardian ad litem usa ka representante nga pilion sa korte aron maseguro ang labing maayo nga interes sa maong lalaki.
Gitugotan usab sa korte ang maong guardian nga muhimo sa tanang gikinahanglang lakang, lakip na ang pagsusi sa mga bank account sa mag-uuma.
Ang kaso pagatukion pag-usab karong Septiyembre ug pabilin nga wala nganli ang lalaki subay sa kamanduan sa korte.