Subling nagpakita og kahanas sa 4th quarter ang rising team nga San Antonio Spurs human nila mapildi ang Golden State Warriors, sa iskor nga 126-113.
Nakasukol pa ang Warriors sa kusog sa Spurs hangtod sa ikatulong quarter, bisan wala nakaduwa ang superstar nga si Stephen Curry.
Natapos ang 3rd quarter nga parehas 94 puntos ang duha ka team.
Apan sa katapusang 12 minutos, kalit miarangkada ang Spurs ug gihimo ang 32-19 run, nga maoy nakahatag nila sa 13-point nga kadaugan batok sa 2022 NBA champions.
Nanguna sa comeback si Victor Wembanyama nga nakaiskor og 26 puntos, 9 rebounds, ug 2 blocks.
Bisan pa sa halos triple-double nga performance ni Draymond Green nga adunay 17 puntos, 12 rebounds, ug 8 assists, wala gihapon kini nakapugong sa kapildihan sa Warriors.
Kini na ang ika-26 nga kapildihan sa Golden State nga may 29 ka daog, samtang ang Spurs adunay 38-16 win-loss record, ikaduhang pinakamaayong kartada sa Western Conference.