Patay ang duha ka indibidwal atol sa aksidente sa kadalanan alas 8:56 kagabie sa Sayre Highway, P-4, Barangay Patpat, Malaybalay City.
Subay sa rekord, giila ang mga biktima kansa nagsakay og motor nga walay plate number nga gimanehuan ni Jhoanis “Dodo” Ganoay, lalaki, 30 anyos, ulitawo, walay lisensya residente sa Purok 6, Bantuanon, Lantapan, Bukidnon. Samtang ang angkas niini giilang si Maykil Ligorhay Amparo, ulitawo, 25 anyos, residente sa Kalabugao, Impasugong Bukidnon.
Sa imbestigasyon sa otoridad, managlahing direksiyon ang gisubay sa mga nalambigit diin nakasugat matud pa sa mga biktima ang usa ka wing van nga dunay karga nga 32 liters stainless water tank nga gimanehuan ni Junnel Tanilon, 37 anyos, minyo ug residente sa Purok 4, Malungon Gamay, Sarangani Province ug nanukad gikan sa Cagayan de Oro City paingon sa Valencia City.
Nasayrang duna kini kaubang helper nga giilang si Ronnel Ata Astronomo, lalaki, 42 anyos, minyo, residente sa Block 4. Spring Valley, Buhangin, Davao City.
Dugang resulta sa imbestigasyon, kusog matud pa ang dagan sa motorsiklo gikan sa Kalasungay, Malaybalay City paingon sa Dalwangan ning siyudad, nga nag-okupar sa innerlane sa amihanang bahin sa dalan.
Gituohang nakainom ang mga sakay sa motor human nga nga narekorber ang usa ka botelya sa ilimnong makahubog usa ka metro ang gilay-on gikan sa gikan sa lugar diin nahitabo ang insidente.
Gani, gisulayan matud pa og dala sa balay tambalanan ang 2 ka mga sakay sa motor, apan gideklara kining dead on arrival.