Musalmot ang Filipino pole vaulter nga si EJ Obiena og laing duha ka torneyo karong bulana.
Kini human makadaog og bronze medal sa INIT Indoor Meeting Karlsruhe sa Germany kaniadtong Lunes sa buntag.
Ang nasangpit nga kadaugan miabot pipila lang ka adlaw human siya nakadaog og gold medal sa Asian Indoor nga gipahigayon sa China.
Matud ni Obiena, nga hapit mapakyas ang partisipasyon niini sa Germany tungod sa scheduling ug travel issues.
Apan, sa tabang sa Embahada sa Pilipinas, nasulbad ang pipila ka mga isyu aron kini hingpit nga makaapil sa kompetisyon sa Germany.
Sa pagkakaron, si Obiena ug ang coach niini mag-regroup una aron susihon ang pisikal nga kondisyon tungod sa grabeng byahe alang sa duha ka torneyo.
Samtang wala pa’y kaseguroan kung makasalmot kini sa torneyo sa France karong Pebrero 19 ug sa Poland karong Pebrero 22.