Usa ka engineering marvel ang makaplagan sa Guangzhou CTF Financial Centre human kini mailhan isip pinuy-anan sa labing paspas nga elevator sa tibuok kalibutan.
Gama sa kompanyang Hitachi ang maong elevator diin makadagan og 1,200 metros matag minuto o katugbang sa 72 km/h.
Tungod sa talagsaon niining kapaspas, kaya niining ihatod ang mga pasahero gikan sa ground floor hangtod sa ika-95 nga andana sulod lamang sa 43 ka segundo.
Gilabwan niini ang kanhi record holder nga Taipei 101.
Apan sumala sa Hitachi, dili lang kapaspas ang ilang prayoridad kundili lakip na usab ang kaluwasan sa mga mosakay. Naggamit sila og mga aerodynamic capsule aron maminusan ang kusog sa hangin (wind resistance) ug mga espesyal nga brake pads nga makasugakod sa kainit nga moabot og 300°C sa higayon nga gikinahanglan ang emergency stop.
Aduna usab kini active guide rollers nga mokuha sa vibration aron magpabiling hapsay ug swabe ang biyahe bisan pa man sa talagsaon niining kapaspas.