Gisumite na alang sa resolusyon ang reklamong plunder batok sa kanhi Ako Bicol Party-list Representative Zaldy Co nga gisang-at sa Department of Justice (DOJ).
Gikumpirma kini ni Justice spokesperson Atty. Polo Martinez.
Kahinumduman nga nagsang-at ang National Bureau of Investigation (NBI) og plunder complaint batok sa kanhi mambabalaod sa DOJ niadtong Enero 5 ning tuiga.
May kalabutan ang maong reklamo sa giingong anomaliya sa flood control project sa Naujan, Oriental Mindoro.
Lakip sa respondents ni Co ang pipila ka opisyal sa Department of Public Works and Highways (DPWH) nga wala hinganli.
Gihatagan sa DOJ si Co og lugway hangtod Enero 15 aron makasumite sa iyang counter-affidavit.
Tukma usab kini sa gisang-at ni Co sa Korte Suprema nga petisyon nga adunay parehas nga petsa, diin gihangyo niya nga hunongon ang pagdungog sa mga kaso batok kaniya sa Sandiganbayan.
Naka-attach usab sa petisyon ni Co ang apostille nga nagpakita nga naa siya sa Stockholm, Sweden niadtong Enero 15, nga sukwahu sa unang balita nga naa siya sa Portugal.