Usa ka talagsaon nga bonding experience ug pagpasalamat sa kinabuhi ang gipakita sa pamilyang Rencoret human nilang makab-ot ang Guinness World Record alang sa “highest altitude achieved on a motorcycle.”
Ang mag-amahanag Francisco ug ang iyang duha ka anak nga sila Max ug Tomás malampusong nakaabot sa 6,639 ka metros sa (Ohos del Salado volcano) Ojos del Salado volcano, ang pinakataas nga aktibong bulkan sa kalibutan.
Sakay sa ilang TRS One XTracks, ilang giatubang ang puno sa yelo kon ice ang mga agianan, hait nga mga bato, ug grabe ka lisud nga terrain sa Atacama Desert sulod sa pito ka adlaw.
Matud ni Tomás, ang ilang ekspedisyon usa ka “Thanksgiving effort” ug simbolo sa ilang lig-on nga panaghiusa isip pamilya. Nalabwan nila ang miaging rekord nga 6,546 metros nga natala niadtong 2020.
Sa tumoy sa bulkan, nagselebrar ang mag-amahan ug nagpakuha og litrato nga nagkupot sa bandila sa Chile, sa wala pa sila mobalik paubos nga dala ang ilang world record title.