Mitaliwan na ang matriarch sa pamilyang Barretto nga si Estrella “Mommy Inday” Barretto sa edad nga 89 niadtong Huwebes, Enero 29.
Ang maong masulub-on nga balita gikonpirma sa usa sa iyang pito ka mga anak nga si Joaquin “JJ” Barretto pinaagi sa usa ka mubo nga mensahe sa social media. Nag-post si JJ og hulagway sa usa ka kandila nga nagdan-ag sa kangitngit uban ang caption nga nag-ingon, “Rest in peace, Mom. I love you.”
Sa wala pa ang iyang pagpanaw, na-confine si Mommy Inday sa Intensive Care Unit (ICU) sa Saint Luke’s Medical Center sa Taguig tungod sa nagkagrabe nga kahimtang sa iyang panglawas. Bisan tuod wala pa opisyal nga gipagawas ang hinungdan sa iyang kamatayon, nahisgutan kaniadto sa iyang anak nga si Claudine Barretto nga nakigbisog ang ilang inahan batok sa sakit nga lupus.
Si Mommy Inday nailhan isip haligi sa usa sa pinakasikat nga pamilya sa showbiz sa nasod ug inahan sa mga aktres nga silang Gretchen, Marjorie, ug Claudine Barretto. Sa pagkakaron, wala pa’y gihatag nga dugang detalye ang pamilya mahitungod sa haya ug lubong sa namatay.