Patay ang pito ka tawo ug 25 ang samaran human sa usa ka suicide bombing sa usa ka kasal sa Dera Ismail Khan, Khyber Pakhtunkhwa, amihanan-kasadpan sa Pakistan.
Matud sa hepe sa lokal nga kapulisan, Adnan Khan, gipahigayon ang pag-atake sa balay sa pro-government community leader nga si Noor Alam Mehsud. Gidala dayon sa tambalanan ang mga biktima, ug pipila niini anaa pa sa kritikal nga kahimtang.
Sumala sa mga nakasaksi, kalit gipabuto ang bomba samtang naglingaw-lingaw ug nagsayaw ang mga bisita. Wala pa’y grupo nga niangkon sa pag-atake, apan gidudahan nga kini binuhatan sa Tehrik-e-Taliban Pakistan (TTP), nga naila sa pagpahigayon og daghang teroristang pag-atake sa nasud sa nangaging mga katuigan.
Mibalik og kusog ang presensya sa Tehrik-e-Taliban Pakistan human mibalik sa gahum ang Afghan Taliban kaniadtong 2021, human sa pag-withdraw sa tropa sa Amerika ug NATO gikan sa Afghanistan, nga nagpahugot sa hulga sa terorismo sa rehiyon.