Usa ka katingalahang panghitabo sa Europa ang gikalingawan human ang usa ka iring nga ginganlan og “Filou” nakabalik sa iyang amo sa France bisan pa sa lima ka bulan nga pagkawala ug pagbiyahe og kapin sa 250 ka kilometro gikan Spain.
Nawala si Filou niadtong Agosto 2025 sa dihang aksidenteng nakagawas kini sa camper van sa French nationals nga sila Patrick ug Evelyne Sire samtang nagbakasyon sa Catalonia, Spain. Wala nila mamatikdi ang pagkawala ni Filou ug nakauli na sila sa France.
Mibalik pa ang magtiayon sa Spain aron mangita ug nag-report sa mga otoridad, apan napakyas ang ilang pagpangita sulod sa pipila ka adlaw.
Sa kadugayan, gidawat na lamang sa duha nga dili na mabalik ang ilang binuhi.
Apan niadtong Enero 9, 2026, nakadawat sila og tawag gikan sa usa ka babaye sa duol nga lungsod sa Homps, France.
Nakapunit matud pa kini iring nga payat na kaayo, gitugnaw ug gikapoy pag-ayo diin mao kini si Filou.
Nakumpirma ang identidad sa iring pinaagi sa microchip nga anaa sa sulod sa iyang lawas, hinungdan sa dakong kalipay ug katingala sa iyang mga agalon.