Gikonsiderar karon sa Department of the Interior and Local Government (DILG) ang pagpataas sa kantidad sa pabuya o reward money alang sa dinalian nga pagdakop sa negosyanteng si Charlie “Atong” Ang.
Matud ni DILG Secretary Jonvic Remulla, tumong niini nga mas mapadali ang pagpangita ug pagdakop kang Ang kinsa nagatubang karon og kasong kidnapping ug serious illegal detention may kalabutan sa kontrobersyal nga pagkawala sa mga sabungero.
Sa pagkakaron, adunay P10 milyones nga pabuya alang sa bisan kinsa nga makahatag og impormasyon sa iyang gitagoan. Gihulagway usab sa DILG si Ang nga “armed and dangerous,” hinungdan nga gihingusgan sa kapulisan ang manhunt operations sa tibuok nasud.
Dugang pa sa kalihim, aduna silay nadawat nga mga taho nga posibleng anaa pa si Ang sulod sa Pilipinas, partikular na sa Luzon, apan wala usab gisalikway ang posibilidad nga nakaikyas kini paingon sa gawas sa nasud pinaagi sa “backdoor exit.”