Nisang-at og motion to quash ang kampo ni kanhi Senador Ramon “Bong” Revilla Jr. aron ipabasura ang kasong malversation batok kaniya, tungod kay matod nila wala siyay kontrol sa pundo ug dili siya accountable officer.
Tungod niini, gibalhin sa Sandiganbayan Third Division ang arraignment ug pre-trial ngadto sa Pebrero 9. Si kanhi Senador Ramon Bong Revilla Jr., nalambigit sa kasong giingong anomaliya sa P92.8 milyones nga flood control projects sa Bulacan.
Sumala ni Associate Justice Karl Miranda, gisusi sa korte kon klaro ba ang alegasyon ug kon unsaon paglambigit ang 2025 General Appropriations Act sa giingong pagpangawat ug pagpamemeke og dokumento.
Base sa testimonya sa Senate Blue Ribbon Committee, nalambigit kuno si Revilla sa pagbalhin sa pundo ug giingong kickbacks, apan gihimakak kini sa iyang kampo.
Sa pagkakaron, nag-atubang siya ug unom ka uban pa og kasong graft ug malversation ug nagpabilin sa New Quezon City Jail sa Payatas samtang gihulat ang desisyon sa korte.