Andam nga mubarog isip saksi si kanhi Ako Bicol Party-list Rep. Zaldy Co sa giduso nga impeachment complaint batok kang Presidente Ferdinand “Bongbong” Marcos Jr. Kini ang gikumpirma ni kanhi Cong. Mike Defensor human ang ilang kampo nakakuha og suporta gikan ni Co, kinsa kanhing nangulo sa House Committee on Appropriations.
Matud ni Defensor, andam si Co nga ibutyag ang iyang nahibalaon mahitungod sa giingong anomaliya sa pondo sa flood control projects ug ang kurapsyon sa “unprogrammed budget” sa nasud.
Gawas sa isyu sa budget, gihisgutan usab ang mga nanggawas nga video ni Co sa social media diin iyang giangkon ang mahitungod sa usa ka maleta nga puno sa kwarta nga alang unta sa Presidente apan napadulong lang sa laing tawo.
Bisan pa sa kaandam ni Co nga motestigo, nakasugat og babag ang grupo ni Defensor human mibalibad ang Office of the House Secretary General sa pagdawat sa ikatulo nga impeachment complaint. Matud sa maong opisina, walay awtoridad ang ilang mga kawani sa pagdawat niini sa pagkakaron.
Tungod sa maong lakang, nagplano si Defensor nga pasakaan og kaso si House Secretary General Reginald Velasco tungod sa giingong paglapas sa Konstitusyon.
Gitakda usab sa grupo nga iduso pag-usab ang impeachment complaint sa higayon nga mobalik na ang sesyon sa Kongreso aron masiguro nga mahatagan og dalan ang kamatuoran.