Kumpirmadong duha ka Pilipinong tripulante ang namatay samtang upat pa ang padayong gipangita human nakulob ang Singaporean-flagged cargo vessel nga M/V Devon Bay sa kadagatan sa Pangasinan, kagahapong adlawa.
Sa kinatibuk-ang 21 ka Pilipinong crew nga sakay sa barko, 17 na ang naluwas. Base sa update gikan sa Chinese Embassy ug PCG, 14 sa mga naluwas ang anaa sa stable nga kondisyon, usa ang giatiman sa ospital, samtang duha ang nakabsan sa kinabuhi.Ang M/V Devon Bay, nga nagkarga og iron ore gikan sa Gutalac, Zamboanga del Sur paingon unta sa YangJiang, China.
Ang katapusang lokasyon sa barko narekord sa 141 nautical miles kasadpan sa Sabangan Point, Agno Bay, Pangasinan, sakop sa Exclusive Economic Zone (EEZ) sa Pilipinas.
Gipasalig ni PCG spokesperson Capt. Noemie Cayabyab nga padayon ang ilang monitoring ug koordinasyon sa Hong Kong Maritime Rescue Coordination Centre aron maseguro ang kaluwasan sa uban pang crew.
Kasamtangan, gisusi pa ang hinungdan sa pagkulob sa barko, diin usa sa gitan-aw mao ang posibleng “liquefaction” sa kargamento niini.