Nakagawas na sa kustodiya sa kapulisan ang asawa nga nasuspetsahan sa pagpanigbas sa iyang bana tungod sa wala paghipos sa manok nga pangsabong, nga nahitabo sa Poblacion, lungsod sa Impasug-ong, Bukidnon.
Sa eksklusibong pakighinabi sa Bombo Radyo Malaybalay kang Police Major Dominador V. Orate Jr., Hepe sa Impasug-ong Municipal Police Station, gibutyag niini nga gipagawas ang suspek nga giilang si Totay Panes human mismong ang biktima nga bana nga giila sa ngalang “Pedro”, ang naghangyo nga dili na ipadayon ang pagpabilin sa asawa niini sa detensyon.
Kahinumdoman nga nahitabo ang insidente kaniadtong Enero 21, 2026, human misangpot sa panaglalis ang magtiayon tungod sa kanunay nga pagyawyaw sa bana mahitungod sa wala paghipos sa asawa sa manok nga pangtari.
Tungod sa kapungot, mikuha ang asawa og sundang nga adunay sako-bag ug intensyon nga bunalan ang bana.
Apan sa dihang gibunalan na kini, natangtang ang sako-bag sa sundang nga maoy hinungdan nga natigbasan ang bana.
Hinuon, anaa na sa luwas nga kahimtang ang biktima, samtang ang asawa niini gipagawas na.