Gihagit ni Senator Risa Hontiveros ang magtiayong kontratista nga sila si Curly ug Sarah Discaya nga mokoopera sa gobyerno kung tinuod silang gustong maapil sa Witness Protection Program (WPP) sa Department of Justice (DOJ).
Dugang pa niini nga kinahanglan nang hunongon sa mga Discaya ang paglikay sa mga pangutana ug paghatag og mga rason sa nagpadayong imbestigasyon sa Senado bahin sa dako nga flood control scandal sa nasud.
Gipahayag sa senadora nga angay sugdan sa magtiayon ang pagtubag og tinuod ug kompleto diha mismo sa Blue Ribbon Committee.Nadismaya usab ang senadora tungod sa pagdumili ni Curly Discaya nga isumite ang ilang ledger o listahan sa mga proyekto gikan sa tuig 2016 hangtod 2022.
Matud ni Sen. Hontiveros, importante kining maong dokumento tungod kay kini ang panahon diin nagsugod sila sa pagdawat og mga dagkong kantidad gikan sa gobyerno.
Kasamtangan, nagsalig ang senadora nga makapangita og paagi si Blue Ribbon Committee Chairman Senator Ping Lacson aron makuha ang maong ledger gikan sa mga Discaya.